Պալիատիվ (ամոքիչ) բժշկական օգնությունը և սպասարկումը առողջապահության համակարգի գործունեության նոր՝ մարդասիրական ուղղություն է: Կարևորելով վերջինս դերն ու նշանակությունը՝ «Պալիատիվ բժշկական օգնության և սպասարկման զարգացման ռազմավարության և միջոցառումների ծրագրի» շրջանակներում իրականացվել են մի շարք միջոցառումներ, ինչի շնորհիվ հնարավոր եղավ Հայաստանում պալիատիվ բժշկական օգնության ներդրումը: Այդ մասին հայտնում են Առողջապահության նախարարությունից:
Առողջապահության նախարարի հրամաններով հաստատվել են պալիատիվ բժշկական օգնության և սպասարկման գործընթացը կանոնակարգող նորմատիվային փաստաթղթեր, պարզեցվել են «պալիատիվ բժշկական օգնություն և սպասարկում» մատուցելու, այդ թվում` շարժական ծառայության համար անհրաժեշտ տեխնիկական և մասնագիտական որակավորման պահանջներն ու պայմանները:
2018-2020 թթ-ին պալիատիվ բուժօգնության և սպասարկման տեսակի գծով լիցենզավորվել է թվով 16 բժշկական կազմակերպություն, որից 10-ը հիվանդանոցային (6-ը` Երևանում և 4-ը` մարզերում) և 6-ը արտահիվանդանոցային (3-ը` Երևանում և 3-ը` մարզերում):
2019 թվականին, առաջին անգամ, Երևանի Թիվ 13 պոլիկլինիկայում և «Մասիս Հոսպիս» ՍՊԸ-ում տեղադրվել է պետպատվեր արտահիվանդանոցային և արտագնա պալիատիվ բուժօգնության գծով: Այսօր արդեն արտահիվանդանոցային պալիատիվ բուժօգնության ծառայության մասով պետական պատվեր տեղադրվել է 7 բժշկական կազմակերպությունում (1-ը` Երևանում և 6-ը` ՀՀ մարզերում):
Ավելին` այս տարի առաջին անգամ առողջապահության նախարարության կողմից սահմանվել է հիվանդանոցային պայմաններով պալիատիվ բժշկական օգնության և սպասարկման միջինացված գին և 2 հիվանդանոցային բժշկական կազմակերպությունում` ԱՆ «Վ.Ա.Ֆանարջյանի անվան ուռուցքաբանության ազգային կենտրոնում» (10 մահճակալ) և «ԱՎԱ ՄԵԴ» պալիատիվ խնամքի և բժշկության կենտրոնում` (13 մահճակալ) տեղադրվել է պետական պատվեր:
Նշենք, որ ԱՆ «Ակադեմիկոս Ս.Ավդալբեկյանի անվան առողջապահության ազգային ինստիտուտում» կազմակերպվել են պալիատիվ բուժօգնության և սպասարկման վերաբերյալ երկշաբաթյա վերապատրաստման դասընթացներ՝ առողջության առաջնային պահպանման հաստատությունների բժիշկների և բուժքույրերի համար, որոնց մասնակցել են 23 բժիշկ և 43 բուժքույր:
0 Մեկնաբանություն