«Ես չեմ իջնում իրենց մակարդակին ու անձնական վիրավորանքներով իրենց պատասխանել չեմ ցանկանում, մեր մեղադրանքի որոշումն այնքան պարզ է ու այնքան հիմնավորված, որ ինձ համար նույնիսկ անհասկանալի է, տեղ-տեղ նաև ծիծաղելի այդ որոշակի մանիպուլյացիաները, որ փորձում են արվել պաշտպանական կողմի ներկայացուցիչների կողմից ». այսօր լրագրողների հետ զրույցում հայտարարել է Հատուկ քննչական ծառայության պետ Սասուն Խաչատրյանը՝ անդրադառնալով Քոչարյանի փաստաբանների դիտարկմանը, թե նրա մեղադրանքը անգրագիտություն է և որ քաղաքական հետապնդում է իրականացվում Ռոբերտ Քոչարյանի նկատմամբ.
«Ռոբերտ Քոչարյանը մեղադրվում է սահմանադրական կարգը բռնի տապալելու մեջ, նման մեղադրանք առաջադրելու համար հիմք է հանդիսացել բանակի ներգրավումը: Բանակի ներգրավումը քաղաքական գործընթացներում ինչպես նախկին այնպես էլ Սահմանադրության ներկայիս խմբագրությամբ, կարող է լինել միայն այն դեպքում, երբ հայտարարված է ռազմական դրություն, ինչպես գիտեք ռազմական դրություն հայտարարված չի եղել», – նշել է ՀՔԾ պետը:
Անդրադառնալով լրագրողների այն հարցին, թե և Քոչարյանի և նրա փաստաբանների կողմից շահարկվում է այն, որ ՀՀ երկրորդ նախագահին հրավիրել են որպես վկա, սակայն հարցաքննել են՝ որպես մեղադրյալ, ՀՔԾ պետը պատասխանել է. «Քրեական դատավարությունը դինամիկ պրոցես է, ապացույցների ձեռքբերումը տեղի է ունենում անընդհատ, ամեն վայրկյան, անձի կարգավիճակը գնահատվում է այդ ապացույցների համակցության հիման վրա»: Սասուն Խաչատրյանը նշել է, որ այդ առումով խախտում չկա, անմիջապես, երբ պետք է քննչական գործողությունները կատարվեին, Քոչարյանին ծանուցվել է, որ նա ունի մեղադրյալի կարգավիճակ:
Անդրադառնալով փաստին, որ նախօրեին 40-ից ավելի պատգամավորներ ստորագրել են Ռոբերտ Քոչարյանի խափանման միջոց կալանքը փոխելու երաշխավորագրի տակ, ՀՔԾ պետն ասել է, որ խափանման միջոցը ընտրվում է վարույթի ընթացքում կասկածյալի կամ մեղադրյալի պատշաճ վարքագիծը ապահովելու անհրաժեշտությունից: «Թյուր կարծիք կա հասարակության մեջ, որ պատշաճ վարքագիծը փախուստի դիմելն է, մոռացվում է, որ դրա բաղադրիչը մեղադրյալի կողմից վարույթին մասնակցող անձանց վրա ապօրինի ազդեցությունը բացառելն է: Այս նախապայմանից ելնելով գտնում եմ, որ Քոչարյանին կալանքի տակ պահելն անհրաժեշտ է »: Սասուն Խաչատրյանը նաև ընդգծել է, որ ամեն ինչ արվում է խիստ իրավական ընթացակարգերում և քաղաքական հետապնդման մասին խոսք լինել չի կարող:
0 Մեկնաբանություն