Մարտի 30-ին հրավիրվել է կառավարության արահերթ նիստ՝ քննարկելու և ընդունելու հակաճգնաժամային ևս 3 փաթեթներ:
Արտահերթ նիստի մեկնարկին Առողջապահության նախարար Արսեն Թորոսյանը ներկայացրել է նոր կորոնավիրուսով պայմանավորված առկա իրավիճակը:
Նախարարը տեղեկացրել է, որ այս պահի դրությամբ կա 482 հաստատված դեպք, որից 58-ը՝ վերջին 1 օրում:
58-ից 25-ը եղել են ի սկզբանե կարանտինում, այսինքն՝ շփման շրջանակ չեն ունեցել,-նշեց նախարարը: Նրա փոխանցմամբ՝ 31-ը, որոնց մեջ կան նաև բուժաշխատողներ, ևս ի սկզբանե եղել են կասկածելի գոտում, միայն 2-ն են, որ արտերկրից բերովի դեպքեր են, և նրանց շփման շրջանակը պարզվում է:
Նախարարը հայտնեց, որ այս պահին ունենք 14 ծանր և 1 ծայրահեղ ծանր դեպք, սակայն ծայրահեղ ծանրի մոտ դրական փոփոխություն է նկատվում, ևս 2 ծանր հիվանդների վիճակը բարելավվում է:
Վարչապետը հետաքրքվել է՝ արդյո՞ք 14 ծանր հիվանդների պարագայում կարելի՞ է որոշակի կանխատեսումներ անել, Թորոսյանն ասել է, որ մեր երկրում ամեն կոնկրետ դեպքն անհատական է. «ունենք նաև երիտասարդ հիվանդ, ով ծանր է այս պահին, սակայն մեծ հավանականությամբ կդադարի ծանր լինել և կապաքինվի: Ամեն կոնկրետ պացիենտի քրոնիկական հիվանդություններն են հիմնականում որոշում ելքը, որովհետև առանց քրոնիկական հիվանդությունների՝ պացիենտները նույնիսկ չեն հասնում ռեանիմացիոն ծառայության»:
Նախարարը տեղեկացրել է, որ երիտասարդ քաղաքացին ուշ է դիմել բժշկական օգնության, այդ պատճառով է նրա վիճակը այս պահին գնահատվոմ ծանր:
Վարչապետը ցավակցություն է հայտնել մահացածների ընտանիքներին և հարազատներին:
Հավելենք, որ վերջին օրերին մահացած 2 պացիենտներն էլ ունեցել են շատ ծանր քրոնիկական հիվանդություններ:
«Նրանցից 1-ն ունեցել է սրտի իշեմիկ հիվանդություն և զարկերակային գերճնշում, 2-դը՝ նույնպես սրտի իշեմիկ հիվանդություն և զարկերակային հիպերտոնիա, սրտամկանի ինֆարկտից և ինսուլտից հետո առաջացած հետևանքներ: Հատկապես այս կարգի քաղաքացիների նկատմամբ առանձնահատուկ ուշադրություն է պետք, որպեսզի նրանք հանկարծ չվարակվեն, որվհետև շատ մեծ ռիսկի դաշտում են հայտնվում։ Կոչ եմ անում մեր բոլոր հայրենակիցներին առանձնակի ուշադիր լինել այս խմբի մեր հայրենակիցների նկատմամբ, պահպանել մեկուսացման ռեժիմը»:
Վարչապետը նաև հետաքրքրվել է՝ ինչպիսի՞ն է հիվանդության հետ կապված դրական դինամիկան։ Նախարարն ասել է, որ 250 քաղաքացի արդեն դուրս է եկել մեկուսացումից:
Հայտնել է, որ մոտ օրերս էլի կունեն բուժված քաղաքացիներ՝ բացի արդեն հայտնի 30 դեպքից:
Առանց սիմպտոմների պացիենտները պահվում են ոչ թե հիվադանոցում այլ, հյուրանոցներում, -հայտնել է վարչապետը՝ ընդգծելով, որ նրանք ոչ մի բժշկական միջամտության կարիք չունեն:
Վարչապետը հետաքրքրվել է նաև մահացության դեպքերի երիտասարդացման լուրերի մասին, ինչին ի պատասխան Թորոսյանն ասել է, որ ուսումնասիրել են: Վիճակագրությունը տարբեր է, հիմնականում կապված է երկրի բնակչության կենսակերպից.
«Օրինակ՝ եթե մենք օրական 3 տուփ սիգարետ ծխող 30 տարեկան մարդ ունենանք, ինքը պոտենցիալ չփրկվող պացիենտ է: Նույն մեր հարևաններից մեկի մասին կար նման տվյալներ, իհարկե, չճշտված, երբ ասում էին, որ արհեստական օդափոխման սարքերի վրա կան բավական մեծ թվով 40-ից ցածր անձինք, պետք է պարզել այդ անձանց առողջական պատկերը»,-նշել է Թորոսյանը:
Պաշտպանության նախարար Դավիթ Տոնոյանն էլ հայտնել է, որ մեկուսացումից և ինքնամեկուսացումից տասնյակ զինծառայողներ վերադառնում են ծառայության՝ վերստուգումից հետո:
ԿԳՄՍ նախարար Արայիկ Հարությունյանն անդրադարձել է հեռավար կրթությանը, վստահեցրել՝ հեռավար կրթության վերաբերյալ հիմնականում դրական արձագանքներ են ստանում, ինչն ուսուցիչների մեծ մասնակցության արդյունք է:
«Իհարկե, ունենք մի խնդիր՝ կապված սարքերի և ինտերնետ կապի հասանելիության հետ, մենք փորձում ենք հընթացս այս հարցին լուծում տալ: Մի նախաձեռնություն ենք իրականացնում, որով հավաքում ենք համակարգիչներ, հիմնականում խոսել ենք միջազգային դոնոր կազմակերպությունների հետ: Մոտ 24.000 աշակերտների պարագայում ունենք խնդիր՝ սարքերի հետ կապված»:
Նախարարը շեշտել է նաև, որ բուհերը ևս շատ արդյունավետ օգտագործում են հեռավար կրթությունը:
Վարչապետը նկատել է, որ այս փորձը կօգնի մեզ հետագայում նաև հեռավոր գյուղերում հեռավար կրթությունը զարգացնելու նպատակին հասնելու գործում:
0 Մեկնաբանություն