Միջազգային

Մեկնարկել է ԱՄՆ նախագահ Դոնալդ Թրամփի դատավարությունը երկրի Սենատում.Ամերիկայի Ձայն

ԱՄՆ-ի Կոնգրեսի Ներկայացուցիչների պալատի նախագահ Նենսի Փելոսին երկրի նախագահ Դոնալդ Թրամփի դեմ իմփիչմենթի մասին հոդվածները հանձնել է Սենեատին։ Ներկայացուցիչների պալատում իմփիչմենթի ենթարկվելուց հետո, Թրամփի շուրջ դատական գործը լսվելու է վերին պալատում։
Դեմոկրատ մեծամասնություն ունեցող Ներկայացուցիչների պալատում այս հարցը քննարկվել էր 4 շաբաթ։ Ներկայացուցիչների պալատի հետաքննությունների հարցերով հանձնաժողովի նախագահ Ադամ Շիֆը և դատական հարցերով հանձնաժողովի նրա պաշտոնակից Ջերոլդ Նադլերը նույնպես կմասնակցեն Սենատում Թրամփի դատավարությանը։ Նադլերի խոսքերով՝ նախագահի մեղքը հաստատող նոր փաստաթղթեր են հայտնաբերվել ու հավելյալ վկաներ ներկայացել։
Դեմոկրատները պիտի փորձեն ապացուցել, որ Թրամփը չարաշահել է իրեն տրված իշխանությունը, երբ Ուկրաինայի նախագահի հետ հեռախոսազրույցի ժամանակ հորդորել է նրան միջամտություն ցուցաբերել ԱՄՆ-ի եկող նախագահական ընտրություններում։
Սենատում հանրապետական մեծամասնության ղեկավար Միթչ ՄըքՔոնելի համաձայն, 2 կողմերն էլ կներկայացնեն իրենց գործերը, մինչև վկաների հարցի քննարկումը։
Հանրապետական սենատոր Ջոն Քենեդին էլ ասում է, թե մեղադրող ու պաշտպանական կողմերի վկայությունները լսելուց հետո միայն իրենք կհայտարարեն, արդյոք կարիք կա հավելյալ վկայություններ լսելու, թե ոչ։
Ինչ վերաբերում է Սպիտակ տանը, պետք է ասել, որ ըստ նախագահական պալատի, նախագահ Թրամփի պաշտպանությունն այնքան դյուրին է լինելու, որ հարցի քննարկումը Սենատում կավարտվի ամենաուշը 2 շաբաթից։
Սակայն նախորդ դեպքում՝ Բիլ Քլինթոնի նկատմամբ իմփիչմենթի հարցով սկսված դատավարությունը 1999 թ. պահանջեց ավելի քան 1 ամիս։
Սենատում Թրամփի դատավարությունը կսկսվի այսօր՝ Վաշինգտոնի ժամանակով ժամը 14։00-ին, երբ ԱՄՆ-ի Գերագույն դատարանի նախագահ Ջոն Ռոբերտսը Սենատում հանդես կգա երդումով, որից հետո կընդունի սենատորների երդումը։

0 Մեկնաբանություն

Թողեք Ձեր մեկնաբանությունը

Ձեր մեկնաբանությունը կավելացվի մեր մոդերատորների հաստատումից հետո *