ԱՄՆ ռազմական մի գործողության արդյունքում, որն իրականացվել է Բաղդադի միջազգային օդանավակայանի մոտակայքում, սպանվել է Իրանի գեներալ մայոր Քասիմ Սուլեյմանին: Սուլեյմանին, երկրից դուրս ռազմական գործողությունների համար պատասխանատու Քուդս հատուկ ուժերի հրամանատարն էր: Նա, ըստ ԱՄՆ-ի, եղել է Մերձավոր Արեւելքում տարբեր ռազմական բախումների հեղինակը:
Սուլեյմանին սպանվել է, երբ ամերիկյան հրթիռները հարվածել են Իրանի ռազմական հրամանատարներին տեղափոխող երկու ավտոմեքենաների:
Իրաքում ԱՄՆ-ի դեսպանությունը կոչ է անում բոլոր ամերիկացիներին արագ հեռանալ երկրից:
Իրանի կառավարությունը մեծ վրդովմունք է արտահայտել Սուլեյմանիի սպանության կապակցությամբ ու հայտարարել , որ սա կարող է տանել դեպի պատերազմ:
Բաղդադի Թահրիրի հրապարակում որոշ խմբեր ուրախությամբ են նշել հատուկ գործողության արդյունքում Սուլեյմանիի սպանության փաստը: Իրաքում Իրանի ազդեցության լծակները, հատկապես անվտանգության ծառայություններում այս երկրի ներգործությունն էին նաեւ դարձել Իրաքում մի քանի ամիս շարունակվող հակակառավարական ցույցերի պատճառ, ցույցեր, որոնց արդյունքում սպանվել է մի քանի հարյուր մարդ:
Մինչ այդ ԱՄՆ-ի օդային ուժերի կողմից Իրանի աջակցությունը վայելող ռազմական ուժերի դեմ իրականացված գործողությունն էր դարձել այստեղ ԱՄՆ-ի դեսպանատունը պաշարելու պատճառ:
Պենտագոնն այժմ հայտարարում է, թե Սուլեյմանիի սպանությունը ‘’պաշտպանական բնույթ ունեցող’’ գործողություն էր, պաշտպանելու համար իր պետական ծառայողներին ու զինվորականներին, ինչպես նաեւ կանխելու Իրանի հետագա հնարավոր գործողությունները:
Սուլեյմանին մեծ ազդեցություն ուներ Սիրիայի ու Իրաքի պատերազմներում, ինչպես նաեւ ուներ ուժեղ կապեր Լիբանանի Հեզբուլլահ շարժման հետ:
Միացյալ Նահանգներն Իրանին է մեղադրում Իրաքում ամերիկյան ուժերի, ինչպես նաեւ Սաուդյան Արաբիայի նավթամշակման գործարանների դեմ իրականացված գործողությունների համար:
Սուլեյմանին Քուդս հատուկ ուժերը ղեկավարել է ավելի քան 20 տարի եւ այդ ընթացքում բազմաթիվ անգամ խույս տվել Արեւմուտքի, Իսրայելի ու Սաուդյան Արաբիայի կողմից իրականացված սպանության փորձերից:
Թեհրանը սպառնում է վրեժխնդրությամբ:
0 Մեկնաբանություն