Մունետիկ

Վանաձորի մարզապալատում սեպտեմբերի 2-4ը ընթանալու է ՀՀ վարչապետի գավաթի խաղարկության Ձեռքի գնդակի տղամարդկանց միջազգային 2-րդ մրցաշարը՝ ՀՀ ձեռքի գնդակի ֆեդերացիայի նախաձեռնությամբ եւ Լոռու մարզպետարանի եւ Վանաձորի քաղաքապետարանի աջակցությամբ: Մասնակցում են Իրանի, Վրաստանի, Բելառուսի եւ Հայաստանի հավաքականները: 2-րդ տարին անցկացվող մրցաշարն առաջին անգամ է անցկացվում Լոռու մարզում: Ձեռքի գնդակի Լոռու մարզային ֆեդերացիայի նախագահ Արսեն Դարբինյանը, կարեւորելով այդ հանգամանքը, նկատում է մարզում ձեռքի գնդակի մասսայականացման անհրաժեշտությունը: Մրցաշարի փակման պաշտոնական արարողությունը կկայանա սեպտեմբերի 4-ին: ՀՀ ձեռքի գնդակի ֆեդերացիայի նախագահ Սարգիս Գրիգորյանի խոսքով՝ մինչ 2010-ի ավարտ Տաշիրում եւ Սպիտակում եւս կբացվեն ձեռքի գնդակի մասնագիտացված մարզադպրոցներ:

Հայաստանում գործող «Բժիշկներ Առանց Սահմանների» կազմակերպությունը դեղորայքակայուն տուբերկուլիոզի հայտնաբերման, ախտորոշման եւ բուժման ծրագրի շրջանակներում ՀՀ Առողջապահության նախարարության, Տուբերկուլիոզի Ազգային Ծրագրի եւ Երեւանի քաղաքապետարանի հետ համատեղ իրականացնում է Բազմադեղորայքային Տուբերկուլիոզի պորտալային ծրագիր Երեւանում: 2008 թ-ից կազմակերպությունը՝ ՀՀ Առողջապահության եւ Արդարադատության նախարարությունների հետ համատեղ ծրագիրն սկսել է իրականացնել Երեւանի բանտարկյալների կենտրոնական հիվանդանոցում, ավելի փոքր մասշտաբով՝ նաեւ Լեռնային Ղարաբաղում: Ծրագրի արդյունավետությունը բարձրացնելու նպատակով 2010թ.-ի մայիսից կազմակերպությունն ընդլայնել է ծրագրի գործունեությունը Լոռու եւ Շիրակի մարզերում: Ներկայումս ընթացքի մեջ է Բազմադեղորայքային տուբերկուլիոզով վարակված 25 հիվանդների բուժումը 2 մարզերում: Ծրագրի շրջանակներում բարելավվում է տուբերկուլիոզի կաբինետների պայմանները 2 մարզերի առողջապահական առաջնային օղակի հաստատություններում եւ բժշկական կենտրոններում: Վանաձորի թիվ 1 պոլիկլինիկայում ծրագրի կազմակերպիչների ջանքերով բացվել է Դեղորայքակայուն տուբերկուլիոզի վերանորոգված կաբինետը:

Հայաստանի Գրողների Միության Լոռու մարզային բաժանմունքի նախաձեռնությամբ կայացել է Ժորա Գրիգորյանի «Երկեր»-ի եւ «Բաժանումների խաչելություն» ժողովածուի շնորհանդեսը: Բանաստեղծը շուրջ 4 տասնամյակ ստեղծագործել է, սակայն երբեւէ նման մեծ ժողովածու չի հրատարակել: Մինչ կենսաթոշակի անցնելը Վանաձորում աշխատել է որպես ճարտարագետ: Մասնագիտությամբ որմնադիր-քարտաշ է, իսկ կոչումով՝ բանաստեղծ: Վերջին տարիներին ապրել եւ ստեղծագործել է Հայաստանում եւ որոշել վերջապես ի մի բերել տարիների գրական ժառանգությունը: Միջոցառմանը հնչել են նաեւ բանաստեղծի գործերից:

Քանդակագործ Սեւոյին՝ Սարգիս Ղարիբյանին, Վանաձորում շատերն են ճանաչում: «60-ամյա երիտասարդ»՝ այսպես են վարպետին բնորոշում հարազատներն ու ընկերները: Սարգիս Ղարիբյան՝ անհատականություն, ով ապրում եւ արարում է իր հայրենի քաղաքի համար: Վանաձորը զարդարող արձաններից շատերը Սեւոյի ձեռքերի ծնունդն են: Օրերս վարպետը տոնել է ծննդյան 60-ամյա հոբելյանը, որին ներկա են եղել քաղաքային այրեր, մտավորականներ, մտերիմներն ու հարազատները: Վարպետը բազմիցս է ցուցադրվել համաքաղաքային ու հանրապետական ցուցահանդեսներում: Ծննդյան 60-ամյակի առթիվ քանդակագործին հանձնվել են պատվոգրեր, շնորհակալագրեր եւ նվերներ:

Լոռու մարզում ցուցակագրված` Հայրենական մեծ պատերազմի 180 վետերաններից, օգոստոսի կեսի դրությամբ, ԽՍՀՄ խնայբանկերում ներդրած ավանդի փոխհատուցում է ստացել 111-ը, 13-ը մահացած է, 14-ն ավանդ չունի, վեցն ավանդի փոխհատուցում ստացել է 2006թ-ին`պայմանավորված նպաստառու լինելու հանգամանքով: Մնացածը հանրապետությունից բացակայում են: Ինչպես հայտնեց Սոցիալական ծառայությունների Վանաձորի տարածքային բաժնի պետի տեղակալ Սամվել Մկրտչյանը, վերջիններիս տեղեկացնելու նպատակով բաժնի աշխատակիցները դիմել են մարզում բնակվող նրանց հարազատներին, ճշտել հասցեներն ու համապատասխան գրություններ ուղարկել: Ըստ Ս. Մկրտչյանի` որոշ ճշտումներից հետո բանկ կուղարկվի եւս 25 վետերանի անուն, ովքեր այս ամսվա վերջին շաբաթում նույնպես կստանան իրենց ավանդների փոխհատուցումը: